Summer Salmon
冠軍
Summer Salmon
鮮甜好飲嘅三文魚番茄湯，煲完湯既三文魚乾爭爭，小朋友唔鍾意食，又唔想做廚餘？我哋不如加啲創意，加啲愛心，加啲配菜，加啲芝士，加埋小朋友一齊製作一個親子 Pizza。和小朋友一齊煮野食，最緊要簡單好玩又好食，為左提高小朋友參與度，煮食過程唔可以太長時間，成個過程都可以參與，小朋友滿足開心，既可以增加自信心，又建立更加良好嘅親子關係。最後煮得開心，食得開心，學會惜飲惜食，唔做大嘥鬼。
Salmon in the pool
材料：油少許、鹽少許、黑椒少許、薑 5 片、三文魚柳 2 件、蕃茄仔 30 粒、小洋蔥 10 粒、水約 1 升
做法：
1. 三文魚柳用鹽和黑椒調味，落油煎香三文魚，放入洋蔥和蕃茄仔，再放入滾水大火煮 8 分鐘。
2. 撈起三文魚柳，再繼續滾 15 分鐘，落少許鹽調味。
Salmon Sunbathing
材料：鹽少許、黑椒少許、油少許、檸檬半個、茄汁 2 湯匙、小洋蔥 2 粒、蕃茄仔 4 粒、白麵包 6 片、雞蛋 4 隻、芝士碎半包、熟三文魚柳
做法：
1. 小朋友幫手把雞蛋加少許鹽打散，小心地將白麵包剪細，再倒入雞蛋漿，拌勻待用。
2. 小朋友用叉把熟的三文魚柳壓碎，加入少許黑椒，待用。
3. 平底鍋搽少少油，把沾滿雞蛋的白麵包碎放到平底鍋，再開細火，放上芝士碎。
4. 成形後，再放茄汁、小洋蔥、蕃茄仔和魚，再鋪滿芝士，蓋上蓋子細火焗至芝士溶化。
5. 放入焗爐 180 度焗 5 分鐘。
6. 最後唧上檸檬汁。
